1
يا ملونين بالقوي يا لللي
يا ملونين ايه اللى حصل لي
بتقولوا عنى رمادي يا خلي
والنعمة لأه متيجي تفلي
طول عمرى مخي أبيض أبيض
ممسوح وكله بيقول ترللي
وقلبي أسود أسود أسود
وأم الرموش قالت كحل لي
كحلت يا ختي وجت بعمايا
الدنيا لونها ايه متقوللي
2
يا ملونين متشوروا عليا
ازاى أراضي الناس حواليا
شقلبت نفسي حطة يا بطا
نطوا عليا كأنى ولية
بلياتشو أنا خدام رجليكوا
أرجوكوا متمدوش رجليا
بلياتشو موز وقيافة وخبرة
وبغبغان بعيون عسلية
يا بابي ارجع تاني يا بابي
دا انتا أسهل منهم ليا
3
بيقوا ليه لونت كلامي
طول عمرى ثورى شريف وعصامي
ده اسمه ذوق اتكيت ونضافة
منا ابن دادى وتيتة ومامي
وغيري كان بيشيله الجزمة
لكني دمى انا كان حامي
أنا كنت بس بدلك رجله
وأعمله ميمون أنا ومدامي
يا كخة انت وهو دا جدو
وايديه نضيفة بس حرامي
4
يا ملونين بالقوى آه يا احنا
تحرير ولاد التيت جرحنا
رشيني آه يا أم المطاهر
بالملح لحسن لونى ف محنة
يا ملونين قولوا ليه عجبوهم
يا ملوناتى قول وصارحنا
عليها حسرة مجت رجليها
بالراحة ادبح يا للى دابحنا
يا أبو البنات استر على عرضي
يا ملون الألوان يا فاضحنا
5
يا ملونين كفايا كوا كفانا
بخ الكولونيا زهقنا نتانة
تلاتين مكانكوا تملي معاه
دلوقتى عاوزين تبقوا معانا
آسفيين .. نو .. لع .. محناش آشفين
من غير سلام سيبوا كل سمانا
يا ملونيين كفاياكوا خيانة
يا ملونيين بالقوى ياللي
مارس2011
ليست هناك تعليقات:
إرسال تعليق