يا مصر انتي الكبيرة والكبير شيال
و بقد تقلك يا شابة بتتقل الأحمال
شقشق صباح الارادة فوق فدادينك
زقزق بقلب العروبة والعرب موال
انت الكبير الكبير ليه ترضى يوم تصغر
دنت الوتد والمدد يا عم وانت الخال
شيخ العرب يا عرب راجع قوى بيكم
مد الأيادى لكم من قال وصالنا محال
داس اللى باع عرضها وطلق تلاتينه
راجع لأهله وحبايبه بالعقال والشال
******
حاولوا وحاول بهم يطمس جبين الشمس
وكنت تلقى الحقيقة في السجون والحبس
الأكسجين في الهوا بإيديهم اتنجس
والوهم كالسرطان كلبش خطاوى النفس
مية سواقي البلد رغوة سراب يا نيل
بفاس عميل الورم تمحي الخضار والغرس
قعد يقول للعيال يا فلاحين كشوا
متصدقوش الهرم عنده أجنده وهلس
يا مصري موت بالأسى يا عبد للكرباج
يا عبد سبح وصلي للرومان والفرس
وقال وقال رجعوا عقرب خطايا الأمس
دي صفحة ما تتنسي يا دفتر الأحوال
******
يا لوحة متبروزة بالضي والاعجاز
كل اللى قاله سفه واسأل عن الانجاز
ملايكة دول لأبشر شوفوا ملامحهم
كل الملامح بهية تعصى على الفراز
من فوق تبان الحقيقة للي شايفهم
حل المعادلة بسيط واضح بدون إلغاز
الشعب قال كلمته والله قبل صوته
تحرير يا شاهد على صوفية البرواز
بسيمفونية امل ما عدش لحن نشاز
مبروك رغيف الصلاة يا سبحة الخباز
يا مصر انت الكبيرة والكبير أستاذ
بنكتة ينسى الوجع ويعدِّل اللى مال
*****
يا مصر عودى لنا بعدك ده حيرنا
طال اغترابنا بنا عنا وعن دارنا
وحشانا يا أم الولد كفارة يا عمة
شوفتى السعادة شموع قايدة ف بيت جارنا
عروسة يا أمتى شمساية ف الفستان
تونس يا زمزم فدا يا نورنا يا نارنا
ليبيا يا صبر المدى يا فوق يفوق الوصف
لحن الشهادة ابتدا لا بأس يقهرنا
مليون سلام ع اليمن ع اللؤلؤة البحرين
مليون سلام يا عرب وبعودة أحرارنا
حاسس بأنى غدا رايح أخد تارنا
في القدس يا امتي والشوق ما عدشي ضلال
******
يا شام يا دمعة شجن ساكنة مواويلي
ياسمين دمشق اترسم في حضن منديلي
شامي أنا في الهوى عنوانى ف الغوطة
والبنت رقصة سماح وجَّة بقنديلي
ده شعر ده يا بشر مش درس جغرافيا
ده اسمه شعب العرب يا دجلة يا نيلي
انسان خطاه م السما والجنة في كفه
والكلمه منه مطر قرآني انجيلي
يا مصر مدي الأيادي هم عزوتنا
من ينسي أهله يا ست الأصل متقولي
لا تسمعي للغُراب في الغربة طال ليلي
*******
ياللي بتشرب تاريخ ف قهوة الأزجال
الغنوة في قُلِّتي موصولة بالصلصال
تجول ف حظر التجول تشبك الأجيال
تشاكس المشكلة وتشكل الأشكال
خيالنا ممكن تخيل والخيل لها الخيال
صوتك مفك الطلاسم كاسر الأقفال
ما احلى السطوع ف السما بعد الأفول يا هلال
انتي الكبيرة يا أمي والكبير شيال
و بقد تقلك يا شابة بتتقل الأحمال
ٌ
