عن هند عن فحوى البساتين
عن نبقة طارحة بشط شبين
عن رمش تقفيل رحمانى
تسلم يا رمش يا أبو النياشين
*****
عن حابي قال جاى ومجاشي
بكتب لقُلَّة متدراشي
فخارها سارح فى الملكوت
وكلمة السر نجاشي
*****
والحلو مالو مطنشنا
وحياة وحاشته انه واحشنا
يا شين يا عين ذوقى رائك
يا هند فوقى أنا كريشنا
*****
يا زتونة تركى ف أسبانى
مكتوب على القلب يعانى
منفى ف بلاد الله فى بلدى
أرمنلى لكن عثمانى
*****
أنا المتيم بمدابحِكْ
أنا كلب بيهيج على نبحِكْ
خاصمتنى شياطين وملايكة
علشان هواك وأنا مسامحِكْ
*****
مسا السنابك يا جنابِكْ
جوقتنا بتحيي سرابِكْ
نحن الظراف فاهمين دورنا
بشويش علينا يا أتابِكْ
*****
أنا ف التاريخ الأغا فَتَكَ
مملوك بكل ملك هَتَكَ
على ايدك انت يا فلاحة
ختم التاريخ سحقته وتكة
*****
بالارتكاز على عود شايخ
وبلفة من برجل دايخ
أبو دقن بيضا هيفتلها
وهيعشقوا شكله البايخ
*****
وأنا وانتى نبقى خبر كان
هيكون عشاهم بدمانا
وعلى الشاشات قنصي وقنصك
هيتم بلا أى إدانة
*****
النعل محبوب أسفلتك
رزم الجراح ملهاش أستك
يا هند ماسخة أحاسيسى
حزنى وافراحى بلاستيك
*****
بوشت عمرى فى كاساتك
شرفى انتسابي لدمعاتك
أنا المحب شاهد قبرك
أنا سطر ف كتاب مأساتك
20/6/2016
المنظور© أحمد منصور الباسل
