عندما يبكى الرجال
اعلمي بإنى هناك
في ثنائية تراب / لؤلؤ
على سطح الرمال
واعلمي بأنى هناك
من عروق صبارك الدمعة
بتجري ع الرمال
تتخزن الدمعات بمأرب حزنها
وتعلا على روس الجبال
واعلمي بإنى هناك
طافي فوق موجة طوفانك
صرت واحد
في أحادية ( للؤلؤ)
تم غسله بالدموع
فاسبحي ف عينى يا عيني وسبحي
واعلمي سر البكا
عندما يبكي الرجال
2
عندما يبكي الرجال
بصي في صفحة دموع الغيم
بصدق وركزى
للرومانسية طباع ما تختفي
حمرة الشمس البعيدة
فوج لبطريق الرجا معشق ملامح خطوته بالتلج طابع في
البرودة دقة القلب ودفاه
شاهدي نفس اعتراض البدء لما قالوا ليه يا خالق الأكوان بتخلق
من يجرح هذه اللوحة بسخافة
شاهدي وقولي اسألي كوني
ملاك وسط الملايكة الناطقين
الرومانسية بشعاع ليزر بضغطة زر
تدخل في غبار ذرى رهيب
يدخل الشاعر يواجه ف ارتفاع مقياس حرارة الانشطار
والاندماج المعضلة
يعدل المفهوم وتصبح واقعية
بس دايما تلقى اعجاز البداية
له ملامح هندي أحمر يعبد الحمرة تلاقيه شايف خلوده ف انتزاع قلب الأسير
حمرة الشمس البعيدة تتفرش ف المدبح الكهْنوتي مخلوطة بْـزغاريد الفرح
حمرة غيرها تغطي تلج القطب الأبيض
والرصاصة صوت صراخ بطريق على عيلته وضحكة ف الاطار
من هنا ..
سلفادور دالي ينعكش ف الورق فنه ويخلق أزمنة مايعة وواحدة واقفة ف الشباك
تخيل حسنها وانى أنا حبيتها موت من غير ما ألمح وشها
هذا المرمز والمؤنث وال .. يا صاحبي
والليالي غول سواده يبين الراجل ونصه وانعدامه
والرصاص جفف البير اللى مجفتش يوم
والآذان أذن بلال
والرجال اتوضوا آه ..
الرجال متيمموش
رغم إن المية جفت
ركزى هناك هتلاقيني ..
لعيون عاشق عجوز
بنحني واتوضى فانسي
كل ماقاله المتيم بالرموز
والمسي جوه العيون
وردة الرمز المحال
واعلمي سر البكا
عندما يبكي الرجال
3
عندما يبكي الرجال
ساحة الحرب اختبار للكون
وتحديد اللى صالح واللى فاقد للصلاحية يا صالحة
شايك الساخن يا بنتي الطيبة
له مواعيده وطباعه
سامحيني
سامحي الشرق اللى قرر
انه يعلن انحيازه بشكل واضح للنعومة
سامحي معنى الرجولة لما شاف
جوه المراية انه أنثى
سامحى هذا التصالح
سامحيني
وبلغيها معنى قومتي برغم كسر الضهر
فوق رمش الحقيقة
نسر مجروح بس جارح
طلته للبحر ندهة
ريحة الشاي من ايديها ليها نكهة
صوتها في وسط العيال
زعقة يا حلوة تخض الريح تخض العرش خضة
تجعل الجنرال عليه نملة
تخاف قطر الندى
يفرح النني ف عيوني يقول لعيني
حاصري رعبه بدموعك
الدموع هي الندى
فاعلمى سر البكا
عندما يبكي الرجال
ليست هناك تعليقات:
إرسال تعليق