يا أمن يا دولة .. يمهل ولا يهمل

صورة من ملف المرحوم خالد سعيد من وثائق أمن الدولة

غنوة كتبتها القشعريرة من العدل الالهي

يُمهلْ ولا يُهمِلْ

ربِّك حكم عادلْ

والفعل متسجـِّل

والفيلم آهوهْ كامل ..

.....

يا دنيا يا ملكوت

العيشة بعدها موت

والآهة مهما تـْطول

ليل الجراح هيفوت

والصبح هيكَـَمِّـل

وبضيهْ هيناضل

.....

قول للتاريخ يا تاريخ

كان في هنا صواريخ

بتمجد الفرعون

وتملـِّكـُو المريخ

وبتمدحْ الأهطل

وبترفع ِ السافل

......

قول للتاربخ زحفوا

ف الجمعة ما اختلفوا

كان الربيع سيفهم

و اتهانوا و اتقطفوا

لا هَمُّهُم منجل

أو قوة م الباطل

......

اكتب وقول يازمان

من يـِوْقِفِ البركان

غضب الشعوب آية

والمجد للانسان

قول للصوص ترحل

الشعب مش راحل

.......

ياللى حرقتوا البلد

منين يجيلكوا المدد

خلاص هتتخزوقوا

بخازوق لأصغر ولد

جَمِّل ما تِتْجَمِّل

طبعك غبي وفاشل

.........

يا عصبة الجواسيس

يا مولعة الكراريس

وجعى أنا كشكول

واضح بدون تلبيس

واللى سحل يُسْحَل

والقتل للقاتل

........

يا أمن يا دولة

مين شقلب الطاولة

أنا الضعيفْ ربي

قال يكـْسب الجولة

باقي ولا أغفل

يا عبد يا زايل

..........

يا مصر يا حِّنة

يا منورة جبينا

هنكمل المشوار

ونسلمه عيالنا

صامدين ومش هنمـِّل

مهما العزول حاول

.........

يا شعب فيك الأمل

مهما يقول من خذل

يا أمة يا مؤمنة

اللهْ مَعَ اللى نزل

يُمهلْ ولا يُهمِلْ

ربِّك حكم عادلْ

6مارس2011